Kryeministri Edi Rama tha sot në Kuvend se çmimi i karburanteve gjatë qeverisjes së PD-së ishte më i lartë se gjatë këtyre viteve që socialistët janë në drejtimin e vendit, edhe pse tashmë është shtuar dhe taksa e karbonit. Në fjalën e tij, ku nuk munguan as replikat nga vendi me demokratët, Rama tha se energjia elektrike në vendin tonë nuk mund të sigurohet e gjithë, dhe për këtë çmimi i saj është padyshim e varur nga tregjet botërore. Edhe pse nuk bëri të qartë nëse do të ketë rritje çmimesh, Rama tha se PD duhet të kyçë gojën për sektorin e energjisë, që sipas tij e rrënuan kur ishin në qeverisje, me faturat që nuk paguheshin nga gjysma e popullsisë.
Rama në Kuvend:
Po të mos ishte për taksën e karbonit, nafta është më lirë se në kohën kur vendi drejtohej nga PD. A ka mundësi që të bëjmë një marrëveshje, që kur flasim të dëgjojmë, na pëlqen sna pëlqen, se dhe mund të iki se kam punë të tjera.Unë po ju them sa lekë nxirrte nga xhepi një drejtues automjeti në Shqipëri që qeverisnit ju për të blerë naftën, diesel dhe benzinën dhe sa nxjerr sot. Sot diesel është 177, dje ishte 182. Patjetër që brenda çmimit të diesel dhe benzinës që dje ishte 186 sot është 179 është brenda dhe detyrimi për të gjithë ata që djegin diesel e benzinë t’ia kthejnë shoqërisë me taksën e karbonit. Dhe kjo nuk ka lidhje me çmimin e bukës, pasi sot e gjithë ditës, furrat e bukës energjinë e marrin me çmim preferencial, rritja e çmimit të bukës ka lidhje vetëm me bursën, kemi zgjedhur ekonominë e lirë të tregut, dhe kemi zgjedhur që të jetojmë në një vend të hapur, të fitojmë nga të gjitha të mirat. Sa për krizën energjitike ne nuk kemi kapacitet të plotë për të përballuar furizimin e plotë. Vetëm për energjinë ju duhet të bëni heshtje, se ju e futët një gjeneratë në dhe, ku për vota mbyllër sytë dhe gjysma vidhte gjysmën tjetër.
Si mund të bëhet një kapërcim epokal, duke iu pasur edhe juve në kurriz, e mbushët miletin me llafe. Asnjë njeri nuk është futur në burg se nuk ka paguar energjinë, vjedhja të çon në burg. Kush nuk paguante drita i këputet lidhja. Natyrisht që ju kërkoni që me faktet të bëni lojë, merrni shikoni tabelën e çmimeve, jam shumë dakord unë që të ardhurat janë ende të ulëta, në raport me sfidat. Po sa paguajnë ata andej, se atyre që më thonë, se ata në Gjermani e kanë pensionin kaq, e rrogën aq, pyeteni pak sa taksa paguajnë ata.
Për të mos rënduar njerëzit në këtë fazë, jemi të vetmit në rajon që e kemi taksën për biznesin e vogël zero.
