50 qytetarë të Shkupit në Maqedoni janë lënduar pas tërmeteve të sotme, në panik për të ikur sa më shpejtë nga shtëpitë e tyre, raportojnë mediat lokale.
Sipas informatave të zdravstvo24.mk, ka mbi 30 pacientë me thyerje të krahëve dhe këmbëve dhe lëndime nga objektet e mprehta.
Raportohet se pasdite, ata u pranuan në Klinikën për sëmundje kirurgjikale “Shën Naum Ohridski”, transmeton Portalb.
Dhjetë prej tyre iu është dhënë ndihmë në Spitalin Shtetëror të Qytetit “8 Shtatori”. Siç u tha nga pacientët, janë lënduar derisa përpiqeshin të iknin nga shtëpitë e tyre gjatë tërmetit të fuqishëm. Një pjesë prej tyre ranë nga shkallët, të tjerët u hodhën nga tarracat nga katet më të ulëta të ndërtesave.
Ambulanca e ndihmës së shpejtë, vetëm për 2 orë, ndërhyu për t’i ardhur në ndihmë 6 të lënduarve, raportojnë mediat lokale.
Ata u transferuan në spitalet në Shkup. Në Qendrën Emergjente në klinikën qendrore janë pranuar dy punëtorë, të cilët gjatë kohës së tërmetit (rreth orës 15:10) punonin në depo. Njëri kishte goditje, kurse tjetri kishte pësuar lëndime nga objekte të mprehta.
