Aeroporti Ndërkombëtar “Nënë Tereza” në Rinas mirëpriti gjatë dy javëve të para të muajit gusht një numër të lartë pasagjerësh, duke thyer rekord. Sipas Autoritetit të Aviacionit Civil, mbi 571,338 pasagjerë kanë ardhur në këtë aeroport, ose rreth 162 mijë pasagjerë më shumë se në të njëjtën periudhë të gushtit 2023. Rritje të konsiderueshme gjatë dy javëve të para të këtij muaji ka shënuar edhe numri i avionëve të përpunuar në Rinas. Sipas Autoritetit të Aviacionit Civil, rezulton se pjesë e trafikut ajror shqiptar kanë qenë 3308 avionë, kundrejt 2566 avionë që u regjistruan në 2 javët e para të gushtit 2023. Shumica e pasagjerëve dhe avionëve të përpunuar janë regjistruar në flukset hyrëse të vendit tonë, duke konfirmuar se edhe përgjatë këtij muaji Shqipëria është kthyer në destinacionin e shumë turistëve të huaj. Edhe gjatë muajit korrik në vendin tonë kanë hyrë mbi 1 milion pasagjerë vetëm nga aeroporti “Nënë Tereza” në Rinas. Referuar shifrave zyrtare, nga janari deri në korrik të këtij viti në aeroport janë përpunuar mbi 5 milionë e 982 mijë pasagjerë, prej të cilëve 3 milionë e 547 mijë e 987 janë të huaj, dhe mbi 2 milionë e 430 mijë janë shqiptarë. Duke qenë se muaji gusht rezulton si periudha më e ngarkuar me flukset e vizitorëve të shumtë, pritet që fluksi i pasagjerëve të jetë tepër i lartë.
