Një avion ushtarak në Kili me 38 persona në bord është zhdukur rrugës për në Antarktidë, dhe nuk ka asnjë gjurmë të tij.
Forca ajrore e Kilit raporton se, avioni i identifkuar si Hercules C130 u ngrit nga Punta Arenas në 16:55 me orën lokale (19:55 GMT), dhe operatorët humbën kontaktin shpejt pas orës 18:00 (21:00).
Sipas BBC, të humbur rezultojnë 17 persona në ekuipazh dhe 21 pasagjerë.
38 personat po udhëtonin për të siguruar mbështetje logjistike për një bazë ushtarake në ishullin King George të Antarktidës.
Ndërkohë autoritetet vendase po punojnë në një operacion kërkim-shpëtimi por ende nuk ka asnjë gjurmë.
Forca ajrore ‘ po vazhdon kërkimin në sektorin ku humbi komunikimi me avionët, në mënyrë që të shpëtojë të mbijetuarit e mundshëm’, raportojnë mediat e huaja.
Ndërsa gjenerali i Forcave Ajrore, Eduardo Mosqueira deklatroi se aeroplani nuk ka aktivizuar asnjë sinjal shqetësimi.
