Zgjedhjet në Kosovë dëshmuan edhe kësaj radhe një histori suksesi. Ndryshe nga zgjedhjet e kaluara në Kosovë, vetëm katër orë pasi ishin mbyllur kutitë e votimit, nisën të raportoheshin rezultatet e para të zgjedhjeve të parakohshme në vendin që ka një histori vetëm 11- vjeçare shtetformues.
Një pjesë e tyre e justifikonin këtë shpejtësi dhe korrektësi me faktin se Kosova është nën monitorim nga faktori ndërkombëtar për njohjet e mëtejshme të saj për t’u bërë më pas anëtare e OKB-së, por dhe nën monitorimin e BE-së për liberalizimin e vizave. Por edhe nëse është kështu, Kosova qëndron shumë më lart, për faktin se kushtet e Gjermanisë për hapjen e negociatave dhe që lidhen me realizimin e Reformës Zgjedhore, nuk janë përkthyer ende në mendjen e politikanëve tanë si emergjencë për vendin.
EKSPERTËT
Ekspertët zgjedhorë, problemin nuk e shohin te sistemi, por te sjellja e aktorëve politikë, të cilët në krahasim me ata të Kosovës, ndryshmi është i dukshëm. Disa e lidhin me sistemin e numërimit të votave, ku në Kosovë bëhen në çdo qendër votimi, ndërsa në Shqipëri numërimi bëhet i përqendruar në çdo KZAZ.
“Ne e kemi patur këtë sistem me përpara, por prapë kemi pasur probleme, dallimi është te kultura e munguar për të zbatuar ligjin”, tha Kristaq Kume, ekspert zgjedhor. Sipas ish-kreut të KQZ-së, “Shqipëria ka nevojë për maxhoranca që formohen si rezultat i koalicioneve paszgjedhore dhe këtë mund ta sigurojë sistemi proporcional i pastër rajonal, ose sistem i përzier maxhoritar plus proporcional”.
Por ajo që i dalloi zgjedhjet e së dielës në Kosovë, përveç daljes së shpejtë të rezultatit, ishte dhe pranimi i humbjes nga opozita e re dhe urimi i fitores prej saj. Historia e zgjedhjeve në Shqipëri ka sjellë pështjellime të situatës politike në vend. I vetmi rrotacion pushteti i qetë ishte ai i vitit 2005, kur në pushtet u rikthyen demokratët, ndërsa ish-Kryeministri socialist, Fatos Nano, pranoi humbjen, uroi fituesin dhe dha dorëheqjen nga kreu i Partisë Socialiste.
