Një merkato e vërtetë televizive mund të quhet pa frikë kjo periudhë për ekranet dhe prezantuesit shqiptarë. Kur na ndan edhe 1 muaj nga nisja e sezonit të vjeshtës, shumë lëvizje janë mësuar dhe janë zyrtarizuar në media e deri më tani plot 8 prezantues janë larguar nga një ekran në tjetrin apo kanë zgjedhur të heqin dorë nga televizioni.
Më poshtë po listojmë të rejat më të fundit lidhur me vendimet që kanë marrë emrat e njohur të ekranit lidhur me karrierën e tyre në televizion.
1- Ilda Bejleri- Sherri i kushton 11 vite Digitalb, e pret Top Channel
Një ndër lëvizjet e bijshme të këtij sezoni ka qenë padyshim ajo e gazetares sportive Ilda Bejleri. Pas 11 vitesh, duket se përplasja me Dritan Shakohoxhën, i ka kushtuar largimin nga Supersport Ildës, e cila ka gjetur menjëherë një shtëpi të re televizive. Në sezonin e ri është konfirmuar se Ilda do të shfaqet në Top Channel dhe dy programet që përfliten për të janë: “Procesi Sportiv” dhe “E Diell”.
2- Sokol Balla- Kaq e pati Vizion Plus, tani në News 24
Merkatoja e ka prekur edhe këtë vit gazetarin politik Sokol Balla. Pas ‘Real Story” në Vizion Plus, Balla mësohet se ka nënshkruan një kontratë me News 24 dhe sipas CNA.al, gazetari do të marrë në duar drejtimin e News 24 dhe të një emisioni politik aty.
3- Dajana Shabani: Lamtumirë karrierës, zgjedh dashurinë!
Prezantuesja e njohur e Ora News ka vendosur të heqë dorë nga ekrani. Pas 2 sezoneve në drejtimin e mëngjesit dhe emisionit “Ditë e Re”, Dajana ka vendosur të largohet jo vetëm nga ekrani i televizionit informativ por edhe nga Shqipëria. Thuhet se prezantuesja do të ndjekë zemrën dhe do të nisë një jetë të re pranë partnerit të saj, boksierit Kamer Maloku që jeton në Gjermani.
4- Kelvi Kadilli: Nga Top Channel në Ora News
Kelvi u mor me bujë në Top Channel, por duket se gjërat nuk shkruan sipas pritshmërive të prezantuesit. Pas bashkëprezantimit të emisionit “Pop Culture”, Kelvi u largua nga Top-i për të nisur një emision të ri në Ora News. Ai së bashku me Arjola Shehun kanë marrë në dorë mëngjeset e RTV Ora.
5- Brunilda Lahe- Pritje të ëmbël larg ekranit
Brunilda Lahe ka zgjedhur që pas 4 vitesh të shkëputet nga ekrani i Tring dhe të lërë emisionin e saj “My Living” për një moment të rëndësishëm të jetës së saj, siç është shtatzënia. Prezantuesja është në muajt e parë të pritjes së ëmbël dhe së shpejti do të sjellë në jetë një vajzë. Ka qenë pikërisht kjo arsyeja që e shtyu Brunildën të marrë kohë për veten dhe të largohet nga ekrani, deri në një moment të dytë.
6- Arber Çepani- Lë mëngjesin në RTSH, po tani…
Arbër Çepani ka mbyllur një eksperincë të rëndësishme e të suksesshme 3-vjeçare në ekranin e e RTSH-së, ku bashkëprezantonte emisionin “Mirëmëngjes Shqipëri”. Pas këtij angazhimi, Çepani ka thënë se do ta shohin në projekte të reja pa specifikuar llojin, formatin apo televizionin ku do të shfaqet.
7- Arjola Shehu- Pas pushimit, nga dreka në mëngjes
Moderatoja ka konfirmuar tashmë vendin e saj në sezonin e ardhshëm. Pas mbylljes së emisionit “Për drekë me mua” në Tv Klan, Arjola pati një periudhë pauze nga televizioni dhe tashmë ka nënshkruar kontratën e saj me Ora News, ku do të bashkëprezantojë me Kelvi Kadillin emisionin e mëngjesit në këtë televizion.
8- Albana Osmani- Pakënaqësitë e lënë jashtë ekranit
Albana Osmani ka zgjehdur të largohet nga Top Channel pas disa sezonesh që mbeti e paangazhuar në emisionet e këtij televizioni. Pakënaqësitë dhe përplasjet me drejtuesit e shtyn prezantuesen shtatlartë të heqë dorë nga televizioni, duke mos sqaruar se çfarë ka ndërmend të bëjë me të ardhmen e saj televizive./
