***
Harlisen luledelet fushave
puthen me fluturat
zogjtë sqepisin njëri-tjetrin
pa drojë , lëndinës
në flladafshin e stinës
***
Qytetin e kanë pushtuar luleblirët
verdhësia e bukur ka praruar drurët,
shpirti mrekulohet nga aromëmirët
trungjet e blirëve mbretërojnë udhët
***
Lule kacavjerrëse, ti
më je varur ndër sy.
më lodron nëpër qerpikë
herë hareshëm, herë me frikë
***
Vjeshtë e artë praroi bjeshkën
nën blegërima vallëzon jeta,
fllad magjie theu heshtjen
nis stivon kujtime të vjetra
