“Luftë” në Radhimë të Vlorës: Policia shkëmben zjarr me një person, terrorizohen...

“Luftë” në Radhimë të Vlorës: Policia shkëmben zjarr me një person, terrorizohen pushuesit

461
0

Shkëmbim zjarri mes policisë dhe një personi në fshatin turistik Radhimë në Vlorë. Ngjarja ka ndodhur rreth orës 17:15 të ditës së sotme teksa efektivët e policisë kanë zhvilluar një operacion për arrestimin e personit, të identifikuar si Gaqo Gjini, 38-vjeç. Policia ka patur informacion se autori i shpallur më parë në kërkim jetonte në një banesë në Radhimë. Pas lokalizimit ai është rrethuar në banesë nga forcat e policisë, por ka qëlluar me armë në drejtim të tyre. Uniformat blu i janë kundërpërgjigjur me zjarr duke e plagosur. Turistë të shumtë janë tmerruar nga breshëria e plumbave dhe kanë nxituar të fshehen në ndërtesat përreth.

 

Njoftimi i Policisë:

 

Sot në Radhimë,  shërbimet e Drejtorisë Vendore të Policisë, të mbështetura nga forcat speciale RENEA, në zbatim të një plani masash për kapjen e një personi në kërkim, ishin duke kryer operacion në banesën e shtetasit të shpallur në kërkim G.Gj., 38 vjeç.

 

I kërkuari ka rezistuar duke tentuar të godasë me mjete prerëse një prej punonjësve të Policisë.

 

Efektivi në kushtet e vetëmbrojtjes e ka neutralizuar duke e goditur me armë një herë në këmbë.

 

Shtetasi G.Gj. është transportuar për të marrë ndihmë mjekësore në Spitalin Rajonal Vlorë dhe  është jashtë rrezikut për jetën.

 

38 vjeçari ishte shtetas i shpallur në kërkim për veprat penale ”Plagosje e rëndë me dashje”, ”Kundërshtim i punonjësve të policisë”, dhe ”Armëmbajtje pa leje”.

 

Vijon puna nën mbikqyrjen e Prokurorisë Vlorë dhe SHÇBA-së, për zbardhjen e plotë të rrethanave të ngjarjes.

 

Policia e Shtetit në kuadër të masave për rritjen e parametrave të sigurisë gjatë sezonit turistik, po ushtron kontrolle të shumta në të gjitha zonat me risk për evidentimin dhe kapjen e personave me precedentë që janë aktualisht në territorin e vendit apo që mund të vijnë gjatë verës nga rradhët e emigrantëve.

 

Këto kontrolle janë shtrirë dhe po vijojnë me forca e shërbime shtesë të policisë kriminale dhe agjentë civilë, për të garantuar një ambjet të qetë dhe të sigurt në qytetet si Durrësi, Fieri, Vlora, Lezha e Shkodra.