Revista Studentore Kampus nisi rrugëtimin e saj në vitin 2017 dhe është dizenjuar me përkushtim për të mbushur hapësirat bosh, për të ngritur lidhje brenda dhe jashtë vendit, si dhe për të qenë një zë i fuqishëm e i lirë, i cili ndërmerr kështu një mision të rëndësishëm për një jetë studentore sa më aktive.
Gjatë vitit 2018 merr jetë dhe projekti i saj i radhës Kampus Charity, një nismë që synon të japë kontributin e saj në arsim, kryesisht tek fëmijët. Gjithashtu u botua numri i parë i Revistës Studentore Kampus, një vazhdimësi e punës së palodhshme për më shumë se një vit në website-n online ( www.revistakampus.org ). Ky botim u shpërnda në Shqipëri e më gjerë, tek studentët shqiptarë në Kosovë, Itali, Francë, Turqi, Greqi etj. Në editorialin hapës të këtij botimi, themeluesi i saj Miri Cela shkruan;
Revista Studentore Kampus sjell për ju eksperiencën dhe sfidat e studentëve shqiptarë në të gjithë botën. Kështu jemi munduar që në çdo artikull të rinjtë dhe veçanërisht studentët të ndihen të përfshirë. Gjithçka që kemi përgatitur vjen si rrjedhojë e një pune të gjatë e të lodhshme, ndaj gjejmë rastin t’iu kërkojmë falje paraprakisht për çdo gabim të mundshëm njerëzor. Shpresojmë që të gjendemi pranë jush në formën më të mirë dhe të harmonizohemi me interesat tuaja duke uruar dhe dëshiruar përmirësime të mëtejshme në numrat e ardhshëm.
Ky zë studentor i quajtur Kampus që tenton të ngrihet fton të gjithë të rinjtë të sugjerojnë, të dërgojnë opinionet, shkrimet apo studimet e tyre duke ngritur kështu një rrjet të fuqishëm komunikimi, duke ndarë dhe diskutuar ide pafund se si mund ta bëjmë eksperiencën tonë studentore të paharrueshme.
Ky organizim vjen pranë jush me një numër të madh aktivitetesh sociale e kulturore. Ne ju sugjerojmë që vazhdimisht të na ndiqni dhe online për të rejat më të fundit. Gjithashtu do të ndihemi të nderuar të na kontaktoni për gjithçka dëshironi në email-in tonë info.revistakampus@gmail.com
