Zgjedhjet lokale të mbajtura dje në vendin tonë, nuk ishin të ndonjë rëndësie të veçantë nga pikëpamja e mandatit, sa kohë që të zgjedhurit, do të qëndrojnë në atë post deri në vitin e ardhshëm, kur dhe do të mbahen zgjedhjet për drejtuesit e bashkive në rang vendi.
Por ama rëndësia e tyre mbetej, për të parë mbështetjen që do të kishin dy fraksionet e opozitës, tashmë të pozicionuar qartazi, një prej tyre në seli, duke u drejtuar nga Lulzim Basha, dhe i dyti në rrugë, e në takimet e Foltores, i drejtuar nga ish-kryeministri Sali Berisha.
Ky i fundit është duke fituar bashkinë e vetme nga opozita, një prej më të rëndësishmeve, atë të Shkodrës, ndërkohë që në 4 Bashki të tjera, kandidatët e Shtëpisë së Lirisë janë pozicionuar në vendin e dytë.
E vetmja Bashki, ku Basha renditet në vendin e dytë është ajo e Rrogozhinës, por diferenca është shumë e ngushtë, nisur dhe nga interesi i pakët që shfaqën dje qytetarët për të marrë pjesë në zgjedhje.
Pjesëmarrja u përllogarit në kufijtë e 30%, dukshëm më e ulët se ajo e zgjedhjeve të fundit parlamentare që u mbajtën në datën 25 Prill. Të treja kampet, pjesëmarrëse në këto zgjedhje, kanë qenë të kursyer në komentet e tyre, ndërsa sot askush nuk ka paralajmëruar ndonjë deklaratë, qoftë edhe për të marrë përsipër humbjen, apo për të shpallur fitoren.
Kur janë numëruar 139 nga 250 qendra votimi në total, në Bashkinë e Shkodrës është duke kryesuar kandidati i Shtëpisë së Lirisë, Bardh Spahia. Ai kryeson me 12037 vota, e ndjekur nga Majlinda Angoni me 10699 vota dhe Xhemal Bushati me 4244 .
Nëse kjo diferencë mes vendit të parë dhe të dytë do të ngushtohet, në më pak se 1177 vota, atëherë zgjedhjet për bashkinë e Shkodrës rrezikojnë të përsëriten.
Kjo për shkak se në 3 qendra votimi, 2 në Shosh dhe 1 në Pult, dje nuk u mbajt procesi zgjedhor për shkak të kushteve të vështira të motit.
Derimë tani procesi i numërimit ka përfunduar në Vorë, ku votimi u bë në mënyrë elektronike, dhe fitues u shpall përfaqësuesi i PS-së Blerim Shera, i ndjekur nga kandidati i Shtëpisë së Lirisë. (Lexo edhe lajmin)
Po ashtu numërimi ka përfunduar në Bashkinë Rrogozhinë, e cila po ashtu u fitua nga socialistët, ndërsa në vendin e dytë u rendit kandidati i PD-së. (Lexo lajmin)
Sipas të dhënave nga KQZ, votat në përqindje ndahen si më poshtë për Bashkinë e Rrogozhinës.
Partia Socialiste:
Edison Memolla – 5348 vota ose 60.73%
Partia Demokratike:
Ferdinand Saraçi – 1996 vota ose 21.96%
Koalicioni “Shtëpia e Lirisë”:
Hekuran Xhani – 1550 vota ose 17.31%
Procesi i numërimit të votave ka ecur më ngadalë në Bashkinë e Durrësit, duke marrë parasysh dhe numrin më të madh të qendrave të votimit.
Në momentin që flasim, sipas të dhënave të përditësuara nga KQZ, në Durrës janë numëruar 177 nga 337 kuti. Votat mes tre kampeve ndahen në: Emirjana Sako 20158 vota, ose e thënë ndryshe 57.6%, Ardian Muka 10075 vota, 28.8% dhe Luan Hoti 4742 vota ose 13.6%.
Rezultati në Durrës pritet që të mos jetë përfundimtar deri në orët e mbrëmjes, pasi ka ende shumë kuti për të numëruar, pavarësisht se trendi i rikonfirmimit të Sakos në detyrë është i dukshëm. (lexo lajmin)
Procesi i numërimit është duke vijuar ende në Bashkinë e Lushnjes, kur janë numëruar 124 nga 157 kuti, rezultati është ky:
Eriselda Sefa, PS 16196 vota ose 57.8%
Elton Bano i Shtëpisë së Lirisë, 8859 vota, ose 31.6% dhe Indrit Sefa i PD 2981 vota, ose e thënë ndryshe 10% të votave. (Lexo lajmin)
Në Dibër, dikur një bastion i të djathëve, është duke kryesuar kandidati i PS-së Rrahim Spahiu, i cili dje nuk votoi dot as për veten e tij, për shkak se e kishte vendbanimin në Tiranë.
Kur janë numëruar 45 nga 101 kuti votimi, Rrahim Spahiu udhëheq me 7556 vota, ose e thënë ndryshe 63%, Premtim Kryemadhi 2310 vota ose 19.5% dhe Luan Haka me 1965 vota, ose 16.5%, dhe Dritan Torba 45 vota, përfaqësues i Lëvizjes së Re.
Gjatë ditës së djeshme në disa zona të Dibrës pati vonesa për shkak të motit të keq, por në fund qendrat e votimit u hapën për të gjithë qytetarët. (Lexo lajmin)
