Deputetja Majlinda Bregu ka qenë e ashpër në qëndrimin e saj në mbledhjen me dyer të mbyllura të kryesisë ku po shqyrtohen kandidaturat për garën për kreun e kësaj partie. Bregu ka thënë se nuk i intereson fare kush zgjidhet kryetar i PD, por fati i partisë. “Nuk më intereson kryetari i PD. As që të merrem me variantin një kundër disave, disa kundër disave se kjo do të thotë shkatërrim përfundimtar i PD. Por ti vëmë kapak se kjo na ra e të dalim të frymëzojmë demokratët për beteja të reja, është tallëse. Si do i frymëzoni? Ua kam thënë prej vitesh këto po s’donit të dëgjonit as të shihnit ku po gremiseshim” – ka thënë Bregu. Bregu tha se fryma e përçarjes dhe linçimit publik për këdo që fliste ka nisur prej 4 vjetësh. “Ia kam thënë Bashës këtu në mbledhje, ka 4 vite që ka nisur përçarja e PD. Fryma e përçarjes dhe e linçimit publik për këdo që fliste e kërkonte të shihte brenda nesh çfarë nuk shkonte për humbjet tona. Siç e sheh kjo mbledhje nxori nevojën e tmerrshme që duhet të kishim folur para kësaj mbledhje. Të debatonim, flisnim, bërtisnim po të doni, por të shihnim njeri-tjetrin në sy për gjëmën që na ka zënë”, – ka deklaruar Bregu.
