Pas një seance gjyqësore maratonë, Gjykata e Shkallës së Parë për Krime të Rënda ka dënuar me 5 vjet burg ish-ministrin e Brendshëm Saimir Tahiri.
Tahiri është shpallur fajtor vetëm për akuzën e shpërdorimit të detyrës, ndërsa ka rënë akuza për trafik droge dhe grup i strukturuar kriminal.
Dënimi për Tahirin do të konvertohet në 3 vjet shërbim prove. Ai përfiton nga gjykimi i shkurtuar.
Ndërkohë ish-drejtori i policisë së Vlorës, Jaled Çela, është dënuar me 3.4 vjet burg.
Prokuroria e Krimeve të Rënda kishte kërkuar 12 vjet burg për Tahirin dhe me uljen e 1/3 së dënimit nga gjykimi i shkurtuar ai duhet të bënte 8 vjet burg nëse gjykata do të pranonte kërkesën.
Tahiri thumbon Xhafën
Para vendimit, ish-ministri deklaroi se nuk ka asnjë provë që ai të dënohet. Duke hedhur poshtë përgjimet, Tahiri tha se në 23 prill ka qenë në drekë me Ramën. Ish-ministri tha se nëse i provohet akuza shkon vetë në burg.
Nuk la pa thumbur Fatmir Xhafën duke i kujtuar vëllain e akuzuar për trafik droge.
Tahiri: Kam 2 vjet që jam nën hetim, unë ministri i Brendshëm akuzohem se kam trafikuar drogë. S’ka asnjë provë. E vetmja provë është se i kam shitur makinën vëllait të Moisi dhe Florjan Habilaj, që nuk është i përfshirë në asnjë akuzë kriminale. Edhe sikur të isha vëllai i Habilajve nuk kisha pse të jem fajtor se vëllezërit merren me drogë. Unë kam qenë në dreke në Dajt me Edi Ramën dhe qeverinë në 23 prill dhe jo me Habilajt. Ja ku janë titujt e gazetave që e kanë publikuar dhe në foto unë me Ramën. Për mua është jeta ime në këtë proces, për ju është vetëm një proces. Më kanë vëne edhe bomba gjatë punës time. Iki në burg vetë nëse më vërtetohen akuzat.
Ndërsa avokati Maks Haxhia tha se më atë dosje, ish-ministri është i pafajshëm.
“Nuk ka fakt tjetër ky proces përveçse pafajësi me atë dosje. Nëse kanë dosje tjetër hajde flasim pastaj”, tha Maks Haxhia.
Gjykata ka konstatuar provat e përmendura në seancën e kaluar
Gjykata ka kontestuar disa nga provat e përmendura në seancën e kaluar nga Saimir Tahiri. Më konkretisht emaili dërguar prokurorit Dritan Prençi, shkresat e dërguara në drejtim të ish Ministres së Mbrojtjes, Mimi Kodheli dhe regjistri i hyrje daljeve në Ministrinë e Brendshme. Sipas gjykatës, këto nuk janë pjesë e dosjes.
Në referimin e Saimir Tahirit, ai shprehet se asnjërën prej tyre nuk e ka depozituar për provë, por e ka parë të arsyeshme që ti përmend pasi ato tregojnë për personalitetin e tij.
“Kam kryer detyrën si ministër i Brendshëm dhe nuk kam lidhje me grupin e strukturuar kriminal”, është shprehur ish-ministri.
Prokuroria kërkoi 12 vite burg
Në seancën e datës 10 shtator, Prokuroria kërkoi 12 vite burg për Tahirin. Por ish-ministri së bashku me ish-drejtorin e Policisë së Vlorës, Jaeld Çela rrezikojnë të vuajnë nga 8 vjet burg nga 12 që kërkoi Prokuroria, në një institucion të sigurisë së zakonshme.
Sipas akuzës nga provat dhe përgjimet në tërësi të bëra nga ana e prokurorisë është arritur në konkluzionin se ish-ministri i Brendshëm u ka siguruar mbrojtje dhe paprekshmëri grupit të trafikantëve ku bënin pjesë edhe kushërinjtë e tij të njohur ndryshe si vëllezërit Habilaj.
