Sot është një ditë e shënuar për letërsinë shqipe dhe veçanërisht për shkrimtarin e madh Ismail Kadare i cili mbush 84 vite jetë.
Presidenti Ilir Meta ka uruar gjeniun e letrave dhe mendimit shqiptar të cilin e quan simbol të vokacionit tonë perëndimor dhe kolos me përmasa botërore.
Meta i ka shprehur urimet më të përzemërta Kadaresë, familjes së tij dhe gjithë kombit shqiptar në këtë ditë të shënuar, duke i uruar jetë të gjatë dhe suksese të reja në krijimtarinë e tij të ndritur.
“Gjeniu i letrave dhe i mendimit shqiptar, simboli i vokacionit tonë perëndimor, Ismail Kadare, kolosi krijues me përmasa botërore, që na bën krenar të gjithëve, feston sot 84-vjetorin e lindjes.
Në këtë datë të shënuar, jo vetëm për të dhe familjen e dashur Kadare, por për mbarë kombin shqiptar, i shpreh shkrimtarin tonë Ismail Kadare, urimet më të përzemërta, shëndet e jetë të gjatë dhe suksese të reja në krijimtarinë e tij të ndritur”, shkruan Meta.
Kadare është një nga shkrimtarët më të mëdhenj të letërsisë shqipe dhe gjithashtu një nga shkrimtarët më të njohur të letërsisë botërore bashkëkohore. Me veprën e tij, që ka shënuar një numër rekord të përkthimeve në mbi 45 gjuhë të huaja, ai e ka bërë të njohur Shqipërinë në botë, me historinë dhe kulturën e saj shekullore.
I vlerësuar me shumë çmime ndërkombëtare, disa herë kandidat i çmimit ‘Nobel’ në letërsi, Kadare u nderua dhe me dekoratën më të lartë franceze ‘Komandant i Legjionit të Nderit’.
