Kryeministri Edi Rama ka monituar sot nga afër ecurinë me kalimin e shërbimeve nga sportelet në online. Shefi i qeverisë tha se tashmë do të jetë administrata në këmbë për qytetarët, dhe jo anasjelltas. Rama tha se të gjithë drejtuesit e zyrave të Administratës Shtetërore, në rast se nuk përgatisin brenda afateve ligjore dokumentet shtetërore që i duhen qytetarit, atëherë ata do të gjobiten.
“Sepse e para është krijuar një ide e gabuar që sportelet do të mbyllen, në fakt nuk do të mbyllen sepse ata tashmë do të jenë shërbëtorë për qytetarët, se nuk do të jenë më policë trafiku. Nëse qytetari vjen për të marrë dokumentit, ai do t’i bëjë derman. Do nxjerr një VKM sot, dhe para afateve ligjore, nëse ti i thua qytetarit ke 15 ditë kohë, ai me siguri do e marrë. Një dokument shtetëror që merret brenda administratës, konsiderohet i dhënë, dhe nuk i thua qytetarit prit, dhe do të gjobitet zyra përgjegjëse. Do të gjobitet drejtuesi i zyrës, nga rroga e tij, për shkelje të ligjit. E bën herën e parë se bën më, se ndryshe nuk funksionon, se iu themi ne qytetarëve do të plotësojmë ne dosjen dhe të mos bëhet. Kjo praktikisht zhduk komplet radhët.”-tha Rama.
Deklarata e kryeministrit Edi Rama vjen dy javë pasi qeveria vendosi modernizimin e sporteleve. Janë 472 aplikime për shërbime që tanimë do të bëhn përmes telefonit, ose edhe kompjuterit. Agjencia Kombëtare e Shoqërisë së Informacionit sqaroi pak ditë më parë se punonjësit janë të trajnuar për të nisur punë me shërbimet online për ditën e sotme. Megjithatë nuk ka vend për panik. Pavarësisht se shërbimet kanë kaluar online, ende nuk janë të mbyllura sportelet.
