Nesër në mbrëmje nis sezoni i ri i programit më të ndjekur të humorit “Portokalli”. Përpos prurjeve të reja në kastin e aktorëve, ky sezon duket se do të ketë dhe ndryshime të tjera. I ftuar pasditen e djeshme në “Ftesë në 5” regjizori Altin Basha, tregoi surprizat e këtij sezoni.
Gjatë intervistës, ai tregoi se sezoni i ri do të ketë ndryshime dhe prurje të reja, por surpriza më e madhe do të jenë moderatorët, pasi nga e diela, “Portokalli” do të drejtohet nga katër moderatorë.
“Fillojmë me 4 moderatorë, do të jetë një surprizë interesante fillimi i këtij sezoni, do të vazhdojmë me surpriza të tjera. Kemi shumë produkt i cili pret të shfaqet dhe jemi të kënaqur me rezultatin. Do jenë 2 aktorë të rinj meshkuj, por do të ketë edhe femra që do të vijojnë në sezon. Do të ketë të ftuar edhe aktorë të njohur”, u shpreh regjizori.
Ende nuk dihet se cilët do të jenë emrat që do prezantojnë krah Xhemit e Salsanos, ndaj na mbetet të presim me padurim të dielën mbrëma.