Pas bllokimit në rrjetet sociale të Presidentit amerikan Donald Trump pas sulmit që ndodhi në Kongres, janë shtuar zërat që 74-vjeçari të censurohet edhe në disa filma që ka marrë pjesë vite më parë.
Konkretisht bëhet fjalë për filmin e njohur dhe të dashur për publikun, “I vetëm në shtëpi 2”. Në këtë film, Donald Trump është pjesë e një episodi të shkurtër.
Trump ka patur disa role të shkurtra në disa filma në vitet ’90 dhe në fillim të viteve 2000, kur ishte biznesmen. Tashmë, një pjesë e përdoruesve të internetit kanë kërkuar që pjesa e Donald Trump të hiqet nga filmi “I vetëm në shtëpi 2” dhe të zëvendësohet.
Ata kanë sugjeruar që Trump të zëvendësohet nga aktori Christopher Plummer në këtë rol.
Llogaritë e Donald Trump në Twitter dhe Facebook janë bllokuar pas sulmit në Kongresin amerikan. Thirrjet e Trump u konsideruan nga këto rrjete sociale si nxitëse për mbështetësit e tij, të cilët sulmuan Kongresin.
Donald Trump do të qëndrojë në detyrë si President i SHBA deri më 20 Janar, ditën kur Joe Biden do të marrë zyrtarisht detyrën.