Mediat e huaja duket se kanë kthyer të gjithë vëmendjen tek Shqipëria dhe gjithçka çfarë nënkupton stabiliteti politik dhe ekonomik i saj për vendin dhe ndikimin e tij në Ballkan. Edhe prestigjozia New York Times, i ka kushtuar një artikull zgjedhjeve më të ‘çuditshme’ në Europë, atyre që do të mbahen ditën e dielë më 30 qershor në Tiranë.
‘Ajo çfarë do të ndodhë të dielën me këto zgjedhje është testi i vërtetë i demokracisë për Shqipërinë,’ thekson prestigjozia amerikane.
Artikulli i plotë
Zakonisht zgjedhjet vendore nuk përbëjnë një sensacion kaq të madh përtej kufinjëve të një shteti, por mbajtja apo dështimi i këtyre zgjedhjeve ditën e dielë në Republikën e Shqipërisë, do të jetë vendimtare për të përcaktuar testin e demokracisë për këtë vend të vogël të Ballkanit Perëndimorë, me aspiratën e madhe për tu bërë pjesë e Bashkimit Europian.
Ndërsa qeveria e drejtuar nga socialistët këmbëngul në mbajtjen e zgjedhjeve, opozita po bojkoton votimin dhe kërkon ta ndalojë këtë proçes me patjetër. Presidenti i Shqipërisë, nga naa tjetër, me dashamirësi ndaj opozitës, ka shkuar një hap më tej duke deklaruar se votimi është anuluar, një vendim që qeveria po refuzon të respektojë.
“Për fat të keq ne po tregojmë se demokracia jonë është e papjekur, e dobët dhe e korruptuar”, thotë Skender Minxhozi, një analist i pavarur. “Ne nuk jemi në gjendje të arrijmë një dialog dhe kompromis të qëndrueshëm”.
Pas disa muajsh protestash të organizuara nga opozita, ndonjëherë edhe të dhunshme, ku demonstruesit kanë hedhur predha drejt oficerëve të policisë të cilët kanë reaguar me gaz lotsjellës, skena është vendosur për një konfrontim të tensionuar që sigurisht pritet të sjellë ndikim edhe për ditën e diel.
Shtetet e Bashkuara, Bashkimi Evropian, organizatat e tjera ndërkombëtare dhe fuqitë e mëdha perëndimore i kanë bërë thirrje në mënyrë të përsëritur opozitës për të shmangur dhunën dhe për t’u angazhuar në një dialog për të zgjidhur bllokimin politik. Ndonëse dhuna është reduktuar kohët e fundit, bojkoti vazhdon.
Udhëheqësit e Organizatës për Siguri dhe Bashkëpunim në Evropë, po dërgojnë 280 vëzhgues zgjedhor, të premten i bënë thirrje udhëheqësve politikë shqiptarë që të tregojnë përmbajtje, të angazhohen në një “dialog konstruktiv” dhe të sigurojnë që zgjedhjet e së dielës të jenë sa më paqësore. Ato shtuan se “të dyja palët si nxitësit ashtu edhe ata që ushtrojnë dhunë do të mbajnë përgjegjësi përpara ligjit.’.
Mbajtja e zgjedhjeve të lira dhe të ndershme ka qenë ‘thembra e Akilit’ për Shqipërinë post-komuniste, ku ka mbizotëruar gjithnjë dhuna dhe vjedhja e votave. Masat e ndërmarra drejt demokracisë konsiderohen si kyçe për nisjen e bisedimeve të anëtarësimit në BE për kombin, i cili tashmë është anëtar i NATO-s. Më herët, po gjatë këtij muaji, Bashkimi Europian shtyu fillimin e bisedimeve të anëtarësimit me Shqipërinë, si dhe me Maqedoninë e Veriut, pavarësisht paralajmërimeve, duke sjellë kështu rrezikun se çdo vonesë apo mangësi do të ketë ndikim në stabilitetin e vendit dhe Ballkanit.
Ditën e diel shqiptarët do të votojnë për të zgjedhur kryetarët e bashkive, këshillave të qytetit. Në Shqipëiri mësohet se rreth 3.5 milion njerëz kanë të drejtë vote – kjo në vetvete është një problem, pasi popullsia e Shqipërisë është vetëm 2.9 milion. Ligjërisht kjo është shpjeguar duke tregaur se emrat e tjerë në regjistrin zgjedhor përfaqësojnë diasporën e madhe në Shqipëri, por nuk ofrohen lehtësira për të lejuar shqiptarët jashtë vendit të votojnë.