Ministri i Brendshëm Sandër Lleshaj ka publikuar këtë mëngjes një foto të flamurit shqiptar të gjetur nën rrënojat e banesave të shembura.
Ky flamur duket se ishte varur nga banorët e ndërtesës së shembur para tërmetit për festat e 28 dhe 29 nëntorit, të cilat na gjetën me një fatkeqësi dhe dhe zemër të vrarë.
Lleshaj thotë se ky flamur “i ndriçoi sytë dhe zemrat e heronjve shqiptarë, që edhe me thonj kanë gërmuar pa pushim për të shpëtuar atë që mund të shpëtohej”.
Shkruan Sandër Lleshaj:
28 Nëntori i sivjetëm na gjen të goditur fort, por jo të thyer.
Ky flamur, që u gjet pak minuta para mesnatës së mbrëmshme, shumë pranë viktimave të fundit të nxjerra nga gërmadhat në Thumanë, sikur i ndriçoi sytë dhe zemrat e heronjve shqiptarë, që edhe me thonj kanë gërmuar pa pushim për të shpëtuar atë që mund të shpëtohej.
Ishte ky flamur, i nxjerë nga rrënojat, që për pak çaste e largoi dhimbjen e përzishme dhe ktheu dritën e shpresës.
Le të jetë ky flamur, lutja jonë për shpirtrat e atyre që e lanë pas, si simbolin më të lartë që bën bashkë shqiptarët kudo që janë dhe mesazhi ynë për nderimin e Festës sonë kombëtare.
Rroftë Shqipëria!
