Të paktën 12 persona kanë vdekur dhe më shumë se 200 janë plagosur pas një tërmeti të fuqishëm që tronditi Afganistanin dhe Pakistanin.
Tërmeti me magnitudë 6.5 dëmtoi ndërtesa, shkaktoi rrëshqitje të dheut dhe bëri që njerëzit të dalin në rrugë.
Lëkundjet u regjistruan të martën në mbrëmje, me qendër në një rajon malor në veri-lindje të Afganistanit, pranë kufirit me Pakistanin.
Lëkundjet nga lugina e largët Jurm u ndjenë deri në Indi.
“Ishte një dridhje e tmerrshme. Unë kurrë nuk kisha ndjerë një dridhje të tillë më parë në jetën time,” tha banorja e Kabulit Khatera për agjencinë e lajmeve AFP pasi doli me nxitim nga apartamenti i saj i katit të pestë.
Nëntë nga vdekjet e konfirmuara u raportuan në rajonin e luginës së Khyber Pakhtunkhwa në Pakistan.
Tre të tjerë humbën jetën në Afganistan, tha zëdhënësi i ministrisë së Shëndetësisë së vendit.
Një fëmijë ishte në mesin e të vdekurve në provincën Laghman pranë kufirit të vendit me Pakistanin, raportoi AFP. Shumë familje kishin dalë nga shtëpitë e tyre duke festuar Vitin e Ri Persian ose Norwuzin kur goditi tërmeti.
Largësia dhe terreni i thyer i zonave të prekura ka të ngjarë të ngadalësojë punën e ndihmës dhe shpëtimit.
Linjat telefonike janë prekur dhe në Pakistan autostrada në zonën më të goditur Sëat është bllokuar nga rrëshqitjet e dheut.
Kryeministri i Pakistanit Shehbaz Sharif u ka kërkuar agjencive të fatkeqësive të marrin masa urgjente për të ndihmuar njerëzit.
Lëkundjet u ndjenë në një zonë prej 1000 km që përfshin Indinë, Uzbekistanin, Taxhikistanin, Kazakistanin, Kirgistanin, Afganistanin dhe Turkmenistanin, sipas Qendrës Sizmologjike Evropiane-Mesdhetare.
Tërmetet janë më të mundshme në këtë rajon, sepse ai shtrihet në kryqëzimin e pllakave tektonike euroaziatike dhe indiane.
Në qershor të vitit të kaluar më shumë se 1,000 njerëz u vranë pas një tërmeti me magnitudë 5.9 që goditi provincën Paktika të Afganistanit, më vdekjeprurësi i vendit në gati një çerek shekulli./
