Sulmuesi i Bayern Munich, Robert Lewandowski i ka dhënë fund një marrëveshjeje sponsorizimi me Huawei, kanë konfirmuar përfaqësuesit e polakut. Kompania kineze e teknologjisë supozohet se ka ndihmuar Rusinë të sigurojë rrjetin e saj kundër sulmeve kibernetike, pas pushtimit të Ukrainës fqinje.
Lewandowski ishte një ambasador i markës globale për Huawei, me profilin e tij që ndihmonte firmën kineze të zgjeronte shtrirjen e saj në Evropë, por ai tani ka ndërprerë të gjitha lidhjet dhe është larguar nga një marrëveshje që do t’i kushtojë rreth 5 milionë euro.
Këshilltari i 33-vjeçarit, Tomasz Zawislak tha gjithashtu për agjencinë e lajmeve AFP: “Sot morëm vendimin për t’i dhënë fund bashkëpunimit të marketingut midis Robert Lewandowski dhe markës Huawei. Zbatimi i të gjitha shërbimeve reklamuese nga ana jonë do të pezullohet, por nuk dua të jap arsye zyrtare për këtë veprim”.
Lewandowski ka folur në mbështetje të Ukrainës që kur nisi pushtimi rus i vendit, urdhëruar nga Vladimir Putin. Ai mbajti shiritin e kapitenit verdhë e blu (ngjyrat e flamurit ukrainas) kur doli në fushë për Bayernin kundër Eintracht Frankfurt, më 26 shkurt.
Sulmuesi polak gjithashtu mbështeti publikisht vendimin e vendit të tij për të bojkotuar ndeshjen gjysmëfinale të “play-off” të Kupës së Botës me Rusinë, që do të zhvillohej më 24 mars.
Kjo ndeshje që atëherë është fshirë nga kalendari, pas një vendimi të FIFA-s dhe UEFA-s se ekipet ruse, kombëtare dhe vendase, pezullohen nga garat kontinentale dhe globale deri në njoftimin e mëtejshëm.
Lewandowski postoi në rrjetet sociale pas këtij pezullimi të rusëve: “Është vendimi i duhur! Nuk mund ta imagjinoj të luaj një ndeshje me kombëtaren ruse në një situatë kur agresioni i armatosur në Ukrainë vazhdon. Futbollistët dhe tifozët rusë nuk janë përgjegjës për këtë, por ne nuk mund të pretendojmë se asgjë nuk po ndodh”.
