KQZ njofton datën, ç’do ndodhë me Agim Kajmakun? Precedenti, si iu hoq...

KQZ njofton datën, ç’do ndodhë me Agim Kajmakun? Precedenti, si iu hoq mandati Rehovicës së LSI dhe Rakipit të PDIU

320
0

Komisioni Qendror i Zgjedhjeve nisi dje zyrtarisht shqyrtimin e përgjigjes së mbërritur nga Prokuroria e Përgjithshme për kryebashkiakun e Vorës, Agim Kajmaku. Përgjigjja e Prokurorisë së Përgjithshme për Kajmakun u është shpërndarë të 5 anëtarëve të KQZ-së për të shqyrtuar aktet. Sakaq, sot mësohet se KQZ do të mblidhet të premten paradite për të shqyrtuar çështjen.Gazeta “Panorama” ka siguruar shkresën e Prokurorisë që ka shkuar në KQZ. Prokuroria e Përgjithshme konfirmon se Agim Kajmaku është i njëjti person me Jorgo Toton, ndaj të cilit, në Greqi, në Gjykatën e Janinës ka pasur një procedim penal për përdorim dhe shpërndarje të parave të falsifikuara.

 

Megjithatë, sipas organit të akuzës, nga hetimet e kryera rezulton se më datë 13.09.2019 ka një vendim pafajësie ndaj Kajmakut. Bazuar në vendimin e Prokurorisë së Përgjithshme të dërguar në KQZ, pafajësia e tij e bën që Kajmaku të mos jetë në kushtet e ndalimit të ushtrimit të detyrës së kryetarit të Bashkisë së Vorës.

 

NJOFTIMI I KQZ PER MBLEDHJEN

 

Komisioni Qendror i Zgjedhjeve, ditën e premte, më datë 01.11.2019, ora 10:00, zhvillon mbledhjen me këtë rend dite:

 

Shqyrtimi i projekt-vendimit:

 

  1. “Shqyrtimin e rezultatit të verifikimit të Prokurorisë së Përgjithshme për funksionarin publik z. Agim Ymer Kajmaku, me funksion Kryetar i Bashkisë Vorë, Qarku Tiranë, në zbatim të ligjit nr.138/2015 ”Për garantimin e integritetit të personave që zgjidhen, emërohen ose ushtrojnë funksione publike”.​

 

PRECEDENTET

 

Komisioni Qendror i Zgjedhjeve ka krijuar dy precedentë të ngjashëm me rastin e kryebashkiakut të Vorës, Agim Kajmaku.

 

Një herë me heqjen e mandatit të deputetit për Aqif Rakipin dhe një herë për heqjen e mandatit të deputetit Gledian Rehovica. Në të dyja rastet, Prokuroria provoi se ata kishin fshehur ndalime apo dënime jashtë vendit në formularin e dekriminalizimit dhe KQZ vendosi t’u heqë mandatin.

 

Edhe Gjykata, kur vendimi i KQZ u animua nga ish-deputeti Aqif Rakipi, la në fuqi vendimin për heqjen e mandatit. Më 5 janar të vitit të kaluar, Komisioni Qendror i Zgjedhjeve, me 5 vota pro, pranoi kërkesën e Prokurorisë së Përgjithshme, e cila pas verifikimit të shenjave të gishtërinjve i akuzoi dy deputetët se me emër të rremë janë ndaluar në shtetin italian rreth 20 vite më parë.

 

Ndonëse Rakipi ankimoi vendimin në Gjykatë, pasi paraqiti vendimin për pafajësinë, kjo e fundit la në fuqi vendimin e KQZ-së me arsyetimin se Rakipi kishte mashtruar në formularin e vetëdeklarimit, duke mos pasqyruar se kishte qenë ndonjëherë i arrestuar/ndaluar nga autoritetet ligjzbatuese.

 

Sakaq, në një deklaratë për mediat ditën e djeshme, sekretari për çështjet ligjore i PD-së, Çlirim Gjata, tha se kryebashkiaku i Vorës, Agim Kajmaku, duhet të arrestohet për shkak të deklarimit të rremë në formularin e vetëdeklarimit.