Kapen 20 mijë euro në Kakavijë, ‘e pëson’ 45-vjeçarja: Po udhëtonte si...

Kapen 20 mijë euro në Kakavijë, ‘e pëson’ 45-vjeçarja: Po udhëtonte si pasagjere në autobusin e linjës Lezhë-Athinë

61
0

Policia ka sekuestruar rreth 20 mijë euro të padeklaruara në pikën kufitare të Kakavijës. Sipas njoftimit zyrtar, të hollat i posedonte 45-vjeçarja me inicialet A.B e cila po udhëtonte si pasagjere në autobusin e linjës Lezhë-Athinë. Gruaja po procedohet penalisht ndërkohë që shuma eshte sekuestruar në cilësinë e provës materiale.

Njoftimi i Policisë:

 

Kakavijë

 

Goditet një rast i mosdeklarimit të të hollave në kufi.

 

Sekuestrohen 20.950 euro.

 

Procedohet penalisht poseduesja.

 

Shërbimet e Policisë Kufitare në Kakavijë, si rezultat i shtimit të kontrolleve me qëllim parandalimin dhe goditjen e paligjshmërisë, bazuar në analizën e riskut, në dalje të RSH-së, kanë kaluar për kontroll në të detajuar në vijën e dytë, shtetasen A. B., 45 vjeçe, banuese në Lezhë dhe rezidente në Athinë, e cila udhëtonte si pasagjere në autobusin e linjës Lezhë-Athinë.

 

Gjatë kontrollit të ushtruar nga shërbimet e Policisë Kufitare, në bashkëpunim me Frontex-in dhe shërbimet doganore, në çantën e 45-vjeçares janë gjetur 20.950 euro, të cilat kjo shtetase nuk i kishte deklaruar. Shuma e parave u sekuestrua në cilësinë e provës materiale.

 

Në përfundim të veprimeve të para të kryera nga specialistët e Seksionit për Hetimin e Krimit Ekonomik e Financiar në DVP Gjirokastër, u procedua penalisht shtetasja A. B., për veprat penale “Mosdeklarimi i të hollave dhe sendeve me vlerë në kufi” dhe “Pastrim i produkteve të veprës penale ose veprimtarisë kriminale”.