Përveç dëmeve në njerëz, koronavairusi ka shkaktuar pasoja të rënda në të gjithë botën.
Mësohet se një prej klubeve legjendare të futbollit uellsian, Rhyl FC, shpalli falimentimin si pasojë e mungesës së financave nga kriza e koronavirusit.
Pas 141 vitesh, ish-skuadra kampione e Uellsit pushon së ekzistuari duke u bërë klubi i parë që nuk i mbijeton dot pasojave të pandemisë Covid-19.
Rhyl pati njoftuar edhe më herët vështirësi në arkat e klubit, madje duke vendosur edhe një afat për përmbushjen e detyrimeve financiare, gjë që nuk u arrit dot, duke sjellë kështu edhe vendimin përfundimtar.
Drejtuesit e klubit tregojnë se ata morën një mbështetje financiare nga ana e Federatës Uellsiane të Futbollit, por nuk ishte mjaftueshëm për të mbijetuar, ndërsa do t’i nevojiteshin të paktën 175 000 paundë për të vijuar aktivitetin e tyre.
“Është një vendim i vështirë i marrë nga bordi drejtues, e gjitha prej impaktit financiar dhe krizës së pandemisë. Është një ditë e errët për të gjithë vullnetarët, drejtuesit, lojtarët, mbështetësit, pasi jemi të gjithë tifozë të këtij klubi dhe e ndjejmë thellësisht. Nuk kemi asnjë dyshim se një klub edhe më i fortë do të ngrihet së shpejti nga kjo pikë”, shkruhej në deklaratën zyrtare të Rhyl FC.
Ndërkohë, përkrahësit e kësaj skuadre kanë nisur mbledhjen e fondeve duke shpresuar në ringritjen e një tjetër skuadre futbolli që do të përfaqësojë qytetin e tyre.