“Akt unik në historinë e vendit tonë”, Meta kujton 100-vjetorin e pranimit...

“Akt unik në historinë e vendit tonë”, Meta kujton 100-vjetorin e pranimit të Shqipërisë në Lidhjen e Kombeve

176
0

Presidenti i Republikës Ilir Meta, me anë të një postimi në “Facebook” ka kujtuar 100-vjetorin e pranimit të Shqipërisë në Lidhjen e Kombeve.

Meta shprehet se ky është një akt unik në historinë e vendit tonë. Kreu i shtetit kujton edhe figurat kryesore që kontribuuan në këtë ngjarje historike për shqiptarët, përfshirë Fan Nolin.

 

Si sot, 100 vjet më parë, Shqipëria pranohet anëtare me të drejta të plota në Lidhjen e Kombeve. Ky akt unik në historinë e kombit tonë, sanksionoi shtetin shqiptar si subjekt të së drejtës ndërkombëtare, por mbi të gjitha përforcoi sovranitetin, rikonfirmoi pavarësinë dhe vendosi garanci për kufijtë e caktuar nga Konferenca e Ambasadorëve të Londrës të vitit 1913.

 

Mundi, sakrificat dhe luftërat e popullit shqiptar, sidomos përpjekjet diplomatike të patriotëve, kudo ku ndodheshin, veçanërisht të Federatës Patriotike “Vatra” dhe kryetarit të delegacionit shqiptar në Lidhjen e Kombeve, Fan S. Noli, u kurorëzuan nëpërmjet këtij akti jashtëzakonisht të rëndësishëm, që e pranoi Shqipërinë, edhe pse të lodhur e të copëtuar nga Lufta e Parë Botërore, si të barabartë mes të gjitha kombeve, me të drejtat dhe detyrimet, që buronin nga anëtarësimi në këtë organizatë.

 

Mirënjohje për kontributin e spikatur të Presidentit amerikan Thomas Ëoodroë Ëilson, i cili nëpërmjet planit të Tij prej 14 pikash hodhi themelet e një paqeje të barabartë në Europë, krijimin e konceptit të kombeve me të drejta të barabarta, pavarësisht madhësisë së tyre dhe vizionin për një organizatë të sigurisë kolektive si Lidhja e Kombeve.