Franco Lerda ka besim te Partizani i tij. Ndalesa e kombëtareve i ka bërë mirë të kuqve, të cilët tashmë kanë në dispozicion të gjithë grupin e futbollistëve.
Pavarësisht formës së shkëlqyer që po kalon Laçi, që vjen pas 4 fitoresh rresht, trajneri italian i Partizanit theksoi se kurrë nuk do të kënaqej me një barazim.
Sa i druheni formës së Laçit dhe si e keni përgatitur ndeshjen?
Laçi vjen nga katër fitore, që kur ka ndryshuar trajneri, ka humbur vetëm ndaj Tiranës dhe është në një moment shumë të mirë. Këtë ne e dimë që do kemi një kundërshtar mjaft të fortë. Gjatë kësaj periudhe jemi përgatitur mirë. Edhe lojtarët e ardhur nga Kombëtarja janë nga një gjendje të mirë dhe besoj se do bëjmë një ndeshje të mirë.
A janë gati lojtarët si ju?
Sigurisht, lojtarët kanë një formë të mirë fizike, duke përfituar nga ndalesa e kampionatit. Sigurisht që edhe kundërshtari është në një moment të mirë. Unë kam besim se do bëjmë një ndeshje të mirë, duke marrë parasysh dhe emrin që ka Partizani do hyjmë për fitore.
Jeni të kënaqur me barazimin?
Këtë pyetje e bëni shpesh. Jo vetëm, te Partizani, por kudo mentaliteti im është që të fitoj gjithmonë dhe nuk kënaqem me barazimin. Unë e hedh skuadrën në fushë për fitoren.
