Partia Demokratike e Kosovës, ka kërkuar rinumërimin e votave. Sipas mediave në Kosovë, PDK ka dorëzuar ankesën dje pasdite, në PZAP, për arsye se pretendon që kanë ndodhur disa parregullsi gjatë numërimit të votave.
Lajmin për Express e ka konfirmuar Mul Desku, kryesues i Panelit Zgjedhor për Ankesa dhe Parashtresa (PZAP).
Sipas tij në PZAP, dje pasdite PDK-ja ka dorëzuar një ankesë me anë të së cilës po pretendon se kanë ndodhur disa parregullsi gjatë numërimit të votave, por nuk ka dhënë ndonjë detaj se çfarë ka kërkuar saktësisht PDK-ja përmes asaj ankese.
“Jemi në dijeni se dje ka ardhur një ankesë nga ky subjekt politik. Deri më tash kaq mund të them, nuk kemi asnjë informacion rreth pretendimeve të ankesës së kësaj partie”, ka thënë Desku.
Sipas tij, tashmë PZAP-i është duke u marrë me ankesën e PDK-së, megjithatë thotë se nuk mund të konfirmojë asgjë nëse qëndron diçka prapa pretendimeve të PDK-së për parregullsi.
“Deri atëherë nuk mund të konfirmojmë se qëndron diçka prapa pretendimeve”, ka thënë Desku.
Ndërkohë, Betim Gjoshi, përfaqësues i PDK-së në KQZ, në një prononcim për Gazetën Express ka konfirmuar se kanë kërkuar rinumërim, pasi pretendojnë që rreth 1000 vota të PDK-së janë bartur te partitë tjera, si pasojë e një defekti në formularët e KQZ-së.
“Realisht nuk jemi anku për shkak të parregullsive. Por KQZ-ja rezultatin e formularëve e ka shtypur në 24 rubrika e kanë qenë 25 parti. Ka disa raste që votat tona janë bartë te subjektet e tjera dhe kemi kërkuar rinumërim që votat me u kthy në vend të vetin, asgjë tjetër. Na kemi kërkua që me u rinumërua që me na u kthy rezultati”, ka thënë Betim Gjoshi për Gazetën Express.
Gjoshi pretendon që rreth 1000 vota të PDK-së kanë shkuar te subjektet tjera.
Ndërkohë, në KQZ tashmë procesi i numërimit të votave po shkon drejt fundit kur kanë mbetur pa u numëruar edhe më pak se 2 për qind të votave. LVV-ja ka dalë e para, LDK-ja e dyta, ndërkohë PDK-ja e Kadri Veselit e treta.
Sakaq, Veseli në një konferencë për media në orët e vona të 6 tetorit pranoi humbjen dhe tha se partia e tij do të shkojë në opozitë.
