Shqipëria U-21 e mbylli me një barazim ndeshjen e tretë, në Grupin 3 kualifikues për Europianin e 21-vjeçarëve, me shifrat 2-2 ndaj Turqisë.
Në fushën e turqve, pjesa e parë pa vendasit dominues, që provonin disa herë drejt portës së kuqezinjve, por nuk ia dolën të shënojnë.
Rast i mirë ai i Kallakut, që shërbehet nga Xhixha brenda zone, por goditja e mesfushorit të Teutës ndalet.
Në të dytën, sapo nis fraksioni i dytë, është Maloku që me një goditje të saktë me kokë, pas harkimit të Kallakut, çon topin në fundin e rrjetës dhe shtang turqit.
Por, vetëm 6 minuta më vonë, në një përgjumje gjatë një goditje këndi, Muldur shënon golin e barazim.
Turqit provojnë sërish duke kërkuar golin e përmbysjes, por rastin më të mirë e pati Omeri, që pas një vjedhje të topit nga ana e Xhixhës, nuk shënoi dot me portën bosh.
Përmbysja për turqit erdhi në minutën e 85-të. Dervishogllu përfiton nga një humbje topi e Lleshit, para mbrojtjes, dhe vetëm me portierin Hoxha nuk fal me të djathtën.
Por, asgjë nuk kishte mbaruar. Në sekondat e fundit, nga një goditje këndi, ishte Kallaku që harkoi në zonë, dhe me kokë devijoi topin për në fundin e rrjetës, Shaqir Tafa, që i dha një pikë të artë ekipit të Bushit.
Pas ndeshjes së tretë në grup, Shpresat kanë 2 pikë, me 1 humbje dhe 2 barazime.
